ԱՐՏԱԼՍԱՐԱՆԱՅԻՆ ՊԱՐԱՊՄՈՒՆՔՆԵՐ

Ֆակուլտետի դասախոսները և ուսանողները ակտիվորեն մասնակցում են համալսարանի արտալսարանային կյանքին` երեկույթներին, ցերեկույթներին, տոնախմբություններին և այլն: Ֆակուլտետն ու ամբիոնը նախաձեռնել են մի շարք հետաքրքիր միջոցառումներ իրենց ուսանողների միջոցով, երբեմն համատեղ այլ բուհերի համանման ֆակուլտետի կամ «Գլաձորի» մյուս ֆակուլտետների ուսանողների մասնակցությամբ: Կազմակերպվում են ուսումնական խաղեր օտար լեզուներով (անգլերեն, ֆրանսերեն, ռուսերեն, մասամբ նաև գերմաներեն և իսպաներեն, որոնք ուղեկցվում են անգլերեն թարգմանությամբ): Կազմակերպվել է երեք խաղ հետևյալ թեմաներով՝ Ղարաբաղյան հիմնահարցը և միջազգային իրավունքը, Հայ դատը և միջազգային իրավունքը, Հայոց ցեղասպանությունը և ցեղասպանության վերաբերյալ միջազգային կոնվենցիան: Այս ուսումնական խաղերի ժամանակ ուսանողները ելույթ են ունենում, վիճում, վերլուծում համապատասխան թեմայի շուրջ և օտար լեզուներով մեկնաբանումեն պայմանագրերի հոդվածներ, միջազգային իրավունքի նորմեր և սկզբունքներ որպես տարբեր երկրների դիվանագետներ իրենց անուններով, որոնք աշխատում են միջազգային կազմակերպություններում և այլն: Ֆակուլտետը կազմակերպել էնաև ինտելեկտուալ խաղ` հարց ու պատասխանի ձևով` համալսարանի բոլոր ֆակուլտետների թիմերի մասնակցությամբ: Նրանախաձեռնությամբ գործել է «Երիտասարդ դիվանագետ» ակումբը Երևանի պետական համալսարանի ուսանողների հետ համատեղ, որի նիստերը տեղի էին ունենում հայերեն, ռուսերեն և անգլերեն լեզուներով: Քննարկվում էին միջազգային հարաբերություններին առնչվող տարբեր հարցեր, ընդհուպ մինչև արվեստի և գրականության հետ կապված, ինչպես օպերային արվեստը և պատմությունը (պատմական թեմաներ շոշափող օպերաներում շեղումը իրողությունից քաղաքական կամ գեղագիտական պատճառներով): Այդ նիստում քննարկվել են Վերդիի «Աիդան» և «Դոն Կառլոսը», Մեյերբերի «Հուգենոտները»: Որպես կանոն՝ ակումբի նիստերը ուղեկցվում են թեմային վերաբերող տեսանյութերի ցուցադրմամբ: Ֆակուլտետը կազմակերպում է նաև ապրիլմեկյան ծիծաղի ցերեկույթ: 2006թ. ցերեկույթի թեման էր «Դիվանագետը և դիվանագիտությունը»: 2007թ. ցերեկույթը խոզի տարվա կապակցությամբ անվանվել էր «Խոզապատում»: 2009թ. ֆակուլտետի չորս ուսանողներ մասնակցեցին համահամալսարանական ինտելեկտուալ խաղին, որի արդյունքում ընտրված երկու լավագույն թիմերը դուրս եկան եզրափակիչ փուլ: Միջազգային հարաբերությունների և պատմության ամբիոնի ու ֆակուլտետի երրորդ կուրսի ուսանողների նախաձեռնությամբ 2009 թ. դեկտեմբերի 3-ին համալսարանի դահլիճում կայացավ ուսանողական գիտական կոնֆերանս` նվիրված Հայաստանի առաջին հանրապետության հիմնադիրներից Արամ Մանուկյանի ծննդյան 130-ամյակին: Կոնֆերանսի առաջին մասում լսվեցին երրորդ կուրսի վեց ուսանողների զեկուցումները Արամ Մանուկյանի կյանքի ու գործունեության առանցքային դրվագների վերաբերյալ, ինչպես նաև ցուցադրվեցին արխիվային վավերագրերի հիման վրապատրաստված հետաքրքիր ու տպավորիչ սլայդներ: Կոնֆերանսի երկրորդ մասում ուսանողներին, դասախոսներին և հյուրերին ներկայացվեց արխիվային եզակի տեսանյութ Առաջին աշխարհամարտի Կովկասյան ռազմաճակատում 1914-1916 թթ. տեղի ունեցած ռազմական գործողությունների, ռուսական զորքերի առօրյայի, Արևմտյան Հայաստանի ու արևմտահայության ճակատագրի վերաբերյալ:Տեսանյութը և արխիվային վավերագրերը տրամադրվել էին Հայաստանի ազգային արխիվի կողմից: Բավական երկար աշխատանք էր պահանջվել տեսանյութը մշակելու և ներկայացնելու համար: Կոնֆերանսն անցավ հետաքրքիր, հագեցած աշխատանքային մթնոլորտում և ունեցավ ուսումնադաստիարակչական նշանակություն. սովորեցրեց գնահատել և արժևորել այն մարդկանց, ովքեր իրենց կյանքը և գործունեությունն ամբողջությամբ նվիրում են հայրենիքին` նրա ազատագրմանը և շենացմանը: