ԱՇԽԱՏԱԿԱԶՄ	ԱՐՏԱԼՍԱՐԱՆԱՅԻՆ ՊԱՐԱՊՄՈՒՆՔՆԵՐ	ԳԻՏԱԿԱՆ ԱՇԽԱՏԱՆՔ

Հիմնադրման օրվանից ֆակուլտետի ուսումնական պլանում ընդգրկվեցին և ներկայումս էլ նրա բակալավրիատի ընդհանուր մասնագիտական և մասնագիտացման դասընթացների կրթաբլոկների առանցքը կազմում են «Միջազգային հարաբերությունների և դիվանագիտության պատմություն», «Նոր պատմություն», «Նորագույն պատմություն», «Ռուսաց կայսրության դիվանագիտության պատմություն», «ԽՍՀՄ արտաքին քաղաքականության և դիվանագիտության պատմություն», «Հայ դիվանագիտության պատմություն», «Հայ գաղթօջախների պատմություն», «Մերձավոր և Միջին Արևելքի երկրների նոր և նորագույն պատմություն», «Հայկական հարցը և միջազգային դիվանագիտությունը», «Հայոց ցեղասպանությունը և մեծ տերությունները XIXդ. վերջին-XXդ. սկզբին», «Պետության և իրավունքի տեսություն», «Միջազգային իրավունք» առարկաները: Դասավանդվում են նաև Հայաստանի արտաքին քաղաքականության և միջազգային իրավունքի հետ կապված հատուկ դասընթացներ, ինչպիսին են «Հայաստանի երրորդ հանրապետության արտաքին քաղաքականությունը (արևմտյան և արևելյան ուղղություններ)», «Ղարաբաղի հիմնախնդիրը և միջազգային դիվանագիտությունը», «Միջազգային հարաբերությունների տեսություն», «Աշխարհաքաղաքականություն», «Դիվանագիտության հիմունքներ», «Դիվանագիտական և հյուպատոսական ծառայություն», «Դիվանագիտական արարողակարգ», «Եվրոպական իրավունք», «Պայմանագրային իրավունք» առարկաները: Ուսումնական գործընթացի մասն են կազմում նաև միջազգային կազմակերպությունների ու տարածաշրջանային հիմնախնդիրների վերաբերյալ դասընթացները: 2010/11 ուստարում ֆակուլտետի ուս.պլանում ընդգրկվեցին նոր դասընթացներ` «Դիվանագիտությունը` հաղորդակցության միջոց»,  «Դիվանագիտական փաստաթղթեր և գրագրություն», «Դիվանագիտության հոգեբանական ասպեկտները», որոնց նպատակն է` բակալավրիատի ուսանողներին ծանոթացնել դիվանագետի աշխատանքի հոգեբանական, մասնավորապես` հաղորդակցական նրբություններին, տեղեկատվություն քաղելու, այն ճիշտ մշակելու հնարքներին, դիվանագիտական փաստաթղթերի տեսակներին և գրագրության առանձնահատկություններին: Ի սկզբանե լուրջ հիմքերի վրա է դրված օտար լեզուների ուսուցումը: Դասավանդվում է երկու օտար լեզու` եվրոպական (անգլերեն, ֆրանսերեն, գերմաներեն) և արևելյան (արաբերեն, թուրքերեն):
Ուսանողների հիմնական մասն անգլերեն ուսումնասիրողներն են: Շեշտը դրվում է բանավոր խոսքի վրա այն հաշվով, որ ֆակուլտետի շրջանավարտն օտարերկրացիների հետ շփվելիս կարողանա ազատ հաղորդակցվել օտար լեզվով: Ուսանողների օտար լեզվով բանավոր խոսքի զարգացմանը նպաստում են համալսարանի լավ սարքավորված և հարմարավետ լինգաֆոնային կաբինետները, օտարալեզու մասնագիտական թարմ գրականությամբ հարուստ գրադարանը, ինչպես նաև «Երկրագիտություն» առարկան: Այն դասավանդվում է ըստ լեզուների` եվրոպական ու արևելյան, և ընդգրկում է տվյալ լեզվի երկրի պատմությունը, աշխարհագրությունը, տնտեսությունը, պետական կառուցվածքը, ներքին ու արտաքին քաղաքականությունը, կենցաղը, ավանդույթները, ազգային ու կրոնական տոները և այլն: Առանձնահատուկ ուշադրություն է հատկացվում համակարգչային գործին: Ֆակուլտետում ուսումնական գործընթացի առավել կարևոր նպատակներից մեկն այն է, որ միջին առաջադիմության շրջանավարտը տիրապետի օտար լեզվին և ունենա համակարգչի հետ աշխատելու հմտություն: Այս դեպքում, ինչպես կյանքը ցույց է տալիս, առավել դյուրին է դառնում աշխատանքի շուկայում համապատասխան տեղ գտնելը: Ուսանողների աշխարհայացքի, ճաշակի, գեղեցիկի նկատմամբ վերաբերմունքի ձևավորմանն ու զարգացմանն են նպատակաուղղված այնպիսի առարկաներ, ինչպիսին են «Փիլիսոփայությունը», «Քաղաքագիտությունը», «Ֆիզիկական դաստիարակությունը», «Մշակութաբանությունը», «Տրամաբանությունը», «Արտասահմանյան գրականության պատմությունը», «Էթնոհոգեբանությունը», «Էկոլոգիայի հիմունքները» և այլն: Միջազգային հարաբերությունների ֆակուլտետի ուսանողներն ուսումնառության ընթացքում հնարավորություն ունեն զբաղվելու իրենց առավել հետաքրքրող արտաքին քաղաքական հիմնախնդիրների, իրադարձությունների, երևույթների, պետական քաղաքական գործիչների գործունեության գիտական ուսումնասիրությամբ և իրենց հետազոտությունների արդյունքները ներկայացնելու ինչպես մասնագիտական առարկաների շրջանակներում կատարվող անհատական, կուրսային, ավարտական աշխատանքներում, այնպես էլ Ուսանողական գիտական ընկերության ամենամյա նստաշրջաններում: Այդ նպատակով ուսանողների տրամադրության տակ են ոչ միայն մասնագիտական գրականությամբ հագեցած գրադարանը, այլև` էլեկտրոնային գրադարանը: Ուսանողական գիտական ընկերության նստաշրջանին ներկայացված հետաքրքիր, պատշաճ մակարդակով զեկուցումների համար ուսանողներն արժանանում են խրախուսանքի` մրցանակի, պատվոգրի, շնորհակալագրի: Ֆակուլտետի աշխատանքում կարևորվում է նաև ուսանողների նախաավարտական ուսումնական պրակտիկայի կազմակերպումը, որը մասնագետ կադրերի գործնական հմտությունների զարգացման կարևոր փուլերից մեկն է: Պրակտիկայի անցկացման գլխավոր նպատակն է` ուսումնառության ընթացքում ուսանողներին տրված տեսական գիտելիքները լրացնել և ամրապնդել գործնական աշխատանքի փորձով և կիրառական ունակություններով: Բացի այդ, պրակտիկայի ընթացքում ուսանողին հնարավորություն է ընձեռվում ծանոթանալ դիվանագիտական փաստաթղթերի, մասնավորապես առանձին պայմանագրերի բովանդակությանը, դրանք ենթարկել վերլուծության և ուսումնասիրության արդյունքներն օգտագործել ավարտական աշխատանք, ինչպես նաև մագիստրոսական ատենախոսություն գրելիս: «Միջազգային հարաբերություններ» մասնագիտության ուսանողների նախաավարտական ուսումնական պրակտիկան կազմակերպվում է ութերորդ կիսամյակում, մեկ ամիս տևողությամբ և անցկացվում է ՀՀ Սահմանադրական դատարանում, Ազգային ժողովի արտաքին կապերի վարչությունում և ԱԺ աշխատակազմի արտաքին կապերի վարչությունում:  ՀՀ Սահմանադրական դատարանում պրակտիկանտները ծանոթանում են այդ հաստատության կառուցվածքին, լիազորություններին, գործունեությանը, ուսումնասիրում են Սահմանադրական դատարանի կողմից լույս ընծայվող <sub>''</sub>Альманах<sup>''</sup> և <sub>''</sub>Конституционное правосудие<sup>''</sup> ամսագրերն ու «Սահմանադրական դատարանի տեղեկագիրը»: Բացի այդ, ուսանողները հանդիպումներ են ունենում ՍԴ բաժինների ղեկավարների հետ, ծանոթանում են առանձին միջազգային պայմանագրերի բովանդակությանը, ՍԴ որոշումներին, թեմատիկ ոլորտներով միջազգային պայմանագրերի համակարգման աշխատանքին, մասնակցում են դասախոսությունների, առանձին դատական նիստերի, ինչպես նաև կատարում են միջազգային վավերացված ու դեռևս չվավերացված պայմանագրերի տեքստերի ուսումնասիրություն, գրում են եզրակացություններ, կատարում դատարանի գրագրության նյութերի թարգմանություն հայերենից անգլերեն ու ռուսերեն, անգլերենից ու ռուսերենից հայերեն լեզուներով:
ՀՀ Ազգային ժողովում  ուսանողները ծանոթանում են հանձնաժողովների և վարչության կառուցվածքին, խնդիրներին, աշխատանքի կազմակերպմանը, մասնակցում են հանձնաժողովների նիստերին, օրինագծերի քննարկմանը, ուսումնասիրում են առանձին օրենքների և պայմանագրերի բովանդակությունը, դրանց համապատասխանությունը ՀՀ Սահմանադրությանը, ծանոթանում են միջխորհրդարանական կապերին, մասնավորապես, եվրոպական ինտեգրացիայի տեսանկյունից դրանց ամրապնդմանը: Պրակտիկայի ընթացքում ուսանողները կատարում են դիվանագիտական փաստաթղթերի թարգմանություն հայերենից անգլերեն և անգլերենից հայերեն լեզուներով, կազմում են արձանագրություններ, հաշվետվություն, տեղեկանքներ:
Պրակտիկայի ավարտից հետո յուրաքանչյուր ուսանողի տրվում է բնութագիր, որը պահվում է ուսանողի անձնական գործում:
Պրակտիկայի ավարտից հետո դրա ընթացքում ուսանողների ձեռք բերած գիտելիքները համեմատվում են նրանց ստացած տեսական գիտելիքների հետ: Այդ նպատակով Հ. Հակոբյանի անվան միջազգային հարաբերությունների և պատմության ամբիոնը կազմակերպում է ուսանողների հաշվետվության պաշտպանություն:
Ավարտական կուրսում լավագույն ուսանողները պաշտպանում են ավարտական որակավորման աշխատանք «Միջազգային հարաբերությունների և դիվանագիտության պատմություն» առարկայից և հանձնում են պետական քննություն` «Միջազգային իրավունք և միջազգային հարաբերությունների ժամանակակից հիմնախնդիրներ», իսկ մնացած ուսանողները հանձնում են երկու պետական քննություն վերոնշյալ առարկաներից:
Միջազգային հարաբերությունների ֆակուլտետի բակալավրիատի շրջանավարտներին տրվում է միջազգային հարաբերությունների բակալավրի պետական նմուշի դիպլոմ:

ԼՐԱՀՈՍ

ՈՐՏԵՂ՞ ԵՆՔ ԳՏՆՎՈՒՄ